南Y島二日一夜逍遙遊

早前同班同事去左其中一個同事南Y島間屋BBQ同過夜... 係我咁大個女第二次去宿營... (哈~)

星期六o既十二點幾仲紅色暴雨，心諗：落到咁，點燒呀? 但好彩同事都係好堅持去左先算，所以最終都決定入去。

到左約定o既上船時間d雨都停左，海面既風浪都唔算大，再加上大家都帶左小玩伴同行，所以大約半小時既船程很快就完。

因屋主要遲入島，所以交低鎖匙俾我地。落船後，我地就沿著大街上演左一幕《尋找他鄉的故事》(音樂響起...)。經過一輪問路之後，我地終於都搵到懷疑係目標地點。 我懷著電視台台慶果d幸運兒既心情去開鎖，可惜失敗左... (差d誤闖民居!!) 好彩好快我地又搵到目標地點二... 今次，我將開鎖我重任先交俾另一個同事，不過佢都唔成功。 攪左好耐，當大家都以為去錯地方時，我決定再試一次，好彩今次終於成功啦!!! (感覺有好多彩色紙碎灑落黎...)

我地放下行裝，就出返大街買野準備今晚既BBQ大餐。 在正式開始買食物之前，大家都被沿途既小商店吸引住，我同nana都買左條頸鏈!! 經過一輪小出血之後，我地終於都正式買晚上既食物。

我地今次既大廚係靚雲... (各位鍾意食野又未有女朋友既朋友可以搵我介紹靚雲你識，佢既廚藝係一流!!) 佢準備左好好味既南乳雞翼、咖哩雞翼、豬排同牛排!! BBQ完畢後，我地出番去大街既一間卡拉ok酒吧上演左另一幕《懷舊金曲夜》。一開門，間吧已經分別有一台大叔同一台大嬸係樹反card，仲有人唱緊秋官d大俠歌... 因為無其他選擇，所以我地都係入左去。我都係第一次去呢種酒郎型式既卡拉ok... 不過，我都好好彩咁有幸聽到南Y島張學友唱歌!! (像真度99.9%)

第二日大家都訓到十點幾先起身... 之後我地去左係南Y島馳名既阿婆豆腐花... 再沿路去下d小商店睇下野、買下野... 到左3點幾我地就正式完結旅程... 係回程的船程中，提起我還在猶疑十月放假去沙巴定係台灣好之時... 大家都建議我去沙巴，因為... 大家都想在十二月公司規訂要放既Christmas Holiday week時約埋去台灣... 希望真的可以成團啦!!!